♻️ بعض النصائح عشان تقدر تقنع أسرتك بإنك مؤهل لفتح مشروعك الخاص ✅

كتير من الشباب بتواجهم إعتراضات من أسرهم  أول ما يقررو بدء حياتهم الخاصة ويسعو نحو إستغلالهم المادي بعيد عن محيط الأسرة والوظيفة التقليدية ، بقرارهم في البدء بتنفيذ مشاريعهم الخاصة .

جزء بقدر يتخطي العقبات دي و الجزء الآخر (بيكسر الحنك) ويقرر الرضخ ويختار يبرر فشلو بإنو ما لقى الدعم وفي النهاية هو الخسران الوحيد .

الأسرة او الوالدين بيطبيعتهم بحاولو دائما حمايتها من صعوبات الحياة وبخافو علينا من الزعل ، والزعل دا ممكن يكون في هيئة (فشل مشروعك)

ونظرتهم هنا بتكون محدودة علي علي الجانب العاطفي أكتر من العقلاني فخلونا ننظر ليهم بالجانب دا عشان نقدر نقنعهم ونتقبل رفضهم وما نطلق عليه مسميات أخرى قد تكون في بعض الأحيان سامة . 

●بعض النصائح عشان تقدر تقنع أسرتك بإنك مؤهل لفتح مشروعك الخاص:

 

_ أظهر ليهم الجدية والإلتزام لأنو طول ما هم شايفنك لسة طايش حتفضل في نظرهم لسة صغير وتحت الوصاية ولو عمرك 30 سنة.

_ابدأ إتكلم معاهم بطرق غير مباشرة عن عالم الأعمال والجوانب الإيجابية فيه ووريهم نماذج لأشخاص صعدو من الصفر للقمة .

_ قبل ما تشاركهم فكرتك شاركها وأدرسها مع نفسك بشكل جيد ، إتاكد إنها مناسبة وانو نسبة نجاحها كبيرة ، جهز كل خطواتك  من البداية حتي النهاية 

بإختصار وإنت عاوز توريهم فكرتك إعتبر نفسك ماشي تقابل مستثمر  يا أقنعتو و قبل يمولك يا فشلت في إقناعو 

وإتذكر إنو مهما كانت النتيجة حيكون سببها أسلوبك في الإقناع.

_إتجنب كل مرة تمشي ليهم بفكرة مشروع جديدة او تكلمهم بإنك عاوز تفتح مشروع من قبل حتي ما تتجهز ليه ، لأنو حيظهر ليهم إنك شخص غير مسؤول ومتردد في إتخاذ القرارات وما عارف نفسك عاوز تعمل شنو .

 

_ حتلاقي رفض في البداية أكيد

بس إتذكر إنو سبب للرفض دا هو خوفهم عليك بالتالي ماف داعي تركب راس او تيأس وتفقد الأمل في مشروعك وتتحطم من أول كلام سلبي يلاقيك. 

_حاول معاهم مرة واتنين وتلاتة لأنو أكيد لمن يشوفو إصرارك حيخضعو في النهاية ،  بس لمن تيأس من أول محاولة او تاني محاولة حيحسو انك اصلاً ما كنت جادي من البداية . 

_حاول بكل الطرق تثبت ليهم كفاءتك ودا بكون بوعيك وإحترامك ليهم وأسلوبك في الطرح .

_علي قدر ما استهترو بيك وبفكرتك إستحمل وما تطلع من شعورك عشان ما تجوط الدنيا وتصل لمحل مسدود .

_حينظرو ليك في البداية  ويدقو جرس بس أوعا تتزهج وتتعنطس عليهم وتحسسهم إنو كلامهم فارغ او انهم ما بفهمو في الحاجات دي اسمع رأيهم اكيد اكيد حتستفيد لو ما في مشروعك حتستفيد من خبرتهم في الحياة وتجاربهم من البشر ، حسسهم بإحترامك ليهم ولأراءهم عشان يحسسوك بإحترامهم ليك ولأفكارك    

    

و كل المطلوب منك في النهاية 

إنك تعافر وتصبر لحدي ما تصل لهدفك  

وأسأل نفسك في كل مرة تفشل في إقناعهم ، لو إنت ما قدرت تقنع محيطك الصغير بفكرتك هل حتقدر تقنع السوق بيها؟

#منصة_ساوني | #المشاريع_الناشئة | #الفرص_و_التحديات

عدد المشاهدات : 1502